No icon

मच्छिन्द्रनाथको रथ तान्न थालेका युवाहरुलाई प्रहरीले हस्तक्षेप गरेपछि झडप

१८ भदौं, काठमाण्डौं ।  स्थानीय युवा र गुठियारले रातो मछिन्द्रनाथको रथ तान्न थालेपछि ललितपुरको पुल्चोकमा आज (विहिबार) प्रहरी र युवाबीच झडप भएको छ ।  रथ तान्न थालेका युवाहरुलाई प्रहरीले हस्तक्षेप गरेपछि युवाहरुले त्यसको विरोध गरेका हुन् । युवाहरुलाई हटाउन प्रहरीले पानीको फोहोरा हान्न थालेपछि त्यसको प्रतिकार गर्दै युवाहरुले ढुङ्गामुढा समेत गरेका छन् ।  युवाहरुलाई रोक्न प्रहरीले केही सेल अश्रुग्यास हानेको छ । युवाहरुले रथ सडकको बीचमा लगेका छन् भने अहिले पनि तनाव भइरहेको छ ।

कोरोना भाइरसको महामारीको जोखिमका कारण स्थानीय प्रशासन र गुठी संस्थानले रथ तान्ने काम रोक्न निर्देशन दिएका छन् । तर मलमास सुरु हुनुअघि अर्थात् असोज २ गतेअघि नै रथलाई बुङ्गमती पु¥याइ सक्नुपर्ने चलन रहेको भन्दै स्थानीय युवा र गुठियारहरुले रथ तान्ने प्रयास गरेका हुन् । चैत २७ गतेदेखि रथ निर्माण सुरु हुनुपर्नेमा लकडाउनका कारण असार १० गतेदेखि मात्रै निर्माण सुरु भएको थियो ।  त्यसपछि पटक–पटक रथ तान्न मिति तोके पनि कोरोनाको जोखिम कम नभएकाले सुरु हुन सकेको थिएन ।   स्थानीयले बारम्बार गरेको अनुरोधलाई प्रशासनले बेवास्ता गरेका कारण पुल्चोकमा तनाव सिर्जना भएको स्थानियहरु बताउँछन्।  युवाहरु रथ तान्न निस्किएपछि अहिले ललितपुर महानगरपालिकामा सरोकारवालाहरुको आपत्कालीन बैठक बसिरहेको छ । जसरी पनि रथ तान्नै पर्ने भएकोले त्यसको व्यवस्थापन स्थानीय प्रशासनले नगरेमा समस्या आउने ज्योतिष कृतिमदन जोशीले बताउनुभयो । उहाँले रथको प्राविधिक पक्ष जाँचको काम नै नभएकोले अहिलेलाई रोकेर तत्कालै व्यवस्थित रुपमा तान्ने व्यवस्था प्रशासनले गर्नुपर्ने बताउनुभयो । 

Comment As:

Comment (0)